കാണാത്ത കാഴ്ച
ഒരാൾ നിത്യവും തൻ്റെ മുറ്റത്തേക്കു നോക്കി പതം പറഞ്ഞുകൊണ്ടിരുന്നു, എന്തൊരു കഷ്ടമാണ്, തോട്ടം മുഴുവൻ കളകയറി. എൻ്റെ ചെടികളൊക്കെ ഈ കാട്ടുചെടികൾ നശിപ്പിക്കും. ഒരു ദിവസം ശ്രദ്ധിക്കാതിരുന്നാൽ ഇതാണ് അവസ്ഥ… എന്നിങ്ങനെ പരാതി നീളും.
ഒരു ദിവസം ഒരു സുഹൃത്ത് അവന്റെ വീട്ടിലെത്തി. അയാൾ ചിരിച്ചുകൊണ്ട് ചോദിച്ചു, “ഹാ എന്തു ഭംഗിയാണ് ആ പൂത്തു നിൽക്കുന്ന മന്താരം കാണാൻ! നിറയെ റോസാപ്പൂക്കളും ഉണ്ടല്ലോ, നല്ല ഭംഗിയാണ് നിൻ്റെ തോട്ടം കാണാൻ. ഇവിടെ ഈ തോട്ടം കണ്ടിരുന്ന് ഒരു ചായയും കുടിച്ച് ദിവസം ആരംഭിച്ചാൽത്തന്നെ ഒരു ഐശ്വര്യമാണ്. അല്ലേ?”
സുഹൃത്തിൻ്റെ വാക്കു കേട്ട് അയാൾ അന്തം വിട്ടു. ഇത്ര ഭംഗിയുള്ള തോട്ടത്തിനെക്കുറിച്ചാണോ താൻ നിത്യവും കുറ്റം പറഞ്ഞിരുന്നത് എന്നോർത്ത് അയാൾ നിശ്ശബ്ദനായി. വർഷങ്ങളായി അയാൾ ചെടികൾ നട്ടു പരിപാലിച്ചിരുന്നു, എന്നാൽ ഓർത്തിരുന്നത് കളകളെക്കുറിച്ചു മാത്രമായിരുന്നു.
ശാസ്ത്രം എന്തു പറയുന്നു?
മനസ്സിന് സ്വാഭാവികമായി ഭീഷണികളും നഷ്ടങ്ങളും കൂടുതൽ ശ്രദ്ധിക്കാനുള്ള പ്രവണതയുണ്ട്. അതുകൊണ്ടുതന്നെ ദുഃഖകരമായ അനുഭവങ്ങൾ കൂടുതൽ വ്യക്തമായി ഓർമ്മയിൽ തങ്ങിനിൽക്കും. ഇതേ തലച്ചോറിന് മറ്റൊരു കഴിവുമുണ്ട്. നാം ബോധപൂർവം നല്ല അനുഭവങ്ങളിലേക്കു ശ്രദ്ധ തിരിക്കുമ്പോൾ, ആ ഓർമ്മകളും കൂടുതൽ ശക്തമായി നിലനിൽക്കാൻ തുടങ്ങും. (തലച്ചോറിന് പക്ഷഭേദമില്ല.)
ആത്മീയ കാഴ്ചപ്പാട്
ജീവിതത്തിൽ പ്രശ്നങ്ങളില്ലെന്നല്ല, മറിച്ച് പ്രശ്നങ്ങൾക്കിടയിലും അവസരങ്ങളുടെ പൂക്കൾ ഉണ്ടെന്ന് കാണാൻ പഠിക്കലാണ് പ്രധാനം.
ഇന്നത്തെ പരിശീലനം
ഇന്ന് രാത്രി എഴുതുക:
ജീവിതത്തിലെ വളരെക്കാലമായി ഓർത്തിട്ടില്ലാത്ത ഒരു സംഭവം ഓർത്തെടുക്കാമോ? ജീവിതത്തിൽ സ്വയം ഇതുവരെ വിലമതിക്കാതെ പോയ മൂന്ന് നല്ല കാര്യങ്ങൾ ഏതൊക്കെയാണ്?
ഇന്നത്തെ വാക്യം
പൂക്കളേക്കാൾ കളകളെ ശ്രദ്ധിക്കുമ്പോൾ നഷ്ടമാകുന്നത് ജീവിതത്തിൻ്റെ നിറക്കാഴ്ചകളാണ്.
