കൊടുക്കൽ വാങ്ങലുകൾ
1
കൊല്ലുന്നവൻറെ നെറ്റിമേലും
കാറ്റ് തന്റെ ഇളം കൈയ്യാൽ തലോടും.
2
പാപിയുടെ കാൽപ്പാദങ്ങളേയും
ജലം നിർന്നിമേഷം കഴുകും.
3
പലിശക്കാരൻറെ കൺപീലികളേയും ചന്ദ്രൻ
സ്നിഗ്ധമാം നിലാവിൽ മുക്കിയെടുക്കും.
4
വേട്ടക്കാരൻറെ കാൽച്ചുവട്ടിലും
ഭൂമി തന്നുടെ മാറ് അമർത്തിക്കിടക്കും.
5
മോഷ്ടാവിന്റെ ശരീരത്തേയും
ഇരുട്ട് തന്നാലാവും വിധം ചേർത്തുപിടിക്കും .
അഞ്ചു ദൃഷ്ടാന്തങ്ങൾ !
അവയെ അറിയുക;
നിങ്ങളുടെ പുറങ്കുപ്പായങ്ങളുടെ തിളക്കത്താൽ ചുറ്റുമുള്ളവരുടെ
കണ്ണുമഞ്ഞളിച്ചു പോകാതിരിക്കട്ടെ!
