വസ്ത്രങ്ങൾ
ലജ്ജയുടെ സാമ്രാജ്യാതിർത്തിയിലാണ്
നൂൽ നൂൽക്കുന്ന തറികളുടെ സമുച്ചയം.
സൂര്യപ്രകാശം തുടർച്ചയായ്
നിറം കൊടുക്കുകയും
കാറ്റ് ഗാഢാലിംഗന പരമ്പരകളിലൂടെ ഉണക്കിയെടുക്കുകയും ചെയ്യുന്ന
തറിച്ചിത്രങ്ങൾ!
ജീവിതത്തിൻറെ രതിച്ചക്രങ്ങൾ!
അഴകിൻ മടിയിലേക്ക്
കുഴഞ്ഞു വീഴുന്ന,
കുടഞ്ഞു വീഴുന്ന വസ്ത്രാഞ്ചലം .
കാണുന്നവർക്ക്
‘നൃത്തം തുടങ്ങട്ടെ’
എന്നുപറയാൻ തോന്നുന്ന രീതിയിൽ
വസ്ത്രം ധരിക്കുവാൻ നിങ്ങൾക്ക്
കഴിയുമാറാകട്ടെ!
