ആത്മജ്ഞാനം
മഞ്ഞു പ്രതിമ പോലെയാണത്.
ഉരുവം കൊള്ളുന്നതിനും
ഉരുകി വീഴുന്നതിനും
ഇടയ്ക്കുള്ള ഒരു ക്ലിപ്തകാലത്തുതന്നെ നിങ്ങൾ അതു കണ്ടെത്തേണ്ടതുണ്ട്.
കാലടികളിൽ
ഒരു ചെറു തരിപ്പ് പടരുമ്പോൾ അറിയുക, നിങ്ങൾക്കു താഴെ, ഒട്ടു താഴെ
ഒരരുവി സുഷുപ്തിയിൽ ആണ്ടിരിക്കുന്നു.
“ഉണർന്നാൽ പുണരുക ;
പുണർന്നാൽ ഉണരുക “
എന്നെഴുതി വെച്ചിട്ടുള്ള
ഗ്ലാസ് വാതിലിനപ്പുറം
സുതാര്യ വസ്ത്രങ്ങൾ മാത്രം വിൽക്കുന്ന കച്ചവടക്കാരാ,
നിങ്ങൾ എന്നേ ആത്മജ്ഞാനത്തിന്റെ പരീക്ഷ പാസായിക്കഴിഞ്ഞിരിക്കുന്നു!
