ഒരാൾ വീട്ടിൽ
കഴുതയെ വളർത്തുന്നു ..
അത് പത്രം ഗേറ്റിൽ നിന്നും
ഉമ്മറത്തെത്തിക്കുമെന്നും
കട്ടൻ ചായയിലേക്ക്
പാൽ ചുരത്തുമെന്നും
ദോഷം വരുത്തുന്ന
അതിഥികളെ കുത്തി മണ്ടിക്കുമെന്നും
ആ വീടിനേയും അയാളെയും
ഒരു പട്ടിയെപ്പോലെ
സ്നേഹിച്ചു പരിപാലിക്കുമെന്നും
അയാൾ വിശ്വസിക്കുന്നു
അയാൾ
വീട്ടിൽ ഒരു ഓന്തിനെ വളർത്തുന്നു
അത് സമയാസമയങ്ങളിൽ
അയാളുടെ
മാനസിക വ്യാപാരങ്ങൾക്ക്
ഉചിതമായ
നിറം ചുവരിന് കൊടുക്കുമെന്ന്
അയാൾ വിശ്വസിക്കുന്നു
അയാൾ
ഒരു ഉടുമ്പിനെ വളർത്തുന്നു ,
അഭിപ്രായങ്ങളിൽ
ഉറച്ചു നിൽക്കാൻ
അത് സഹായിക്കുമെന്ന്
അയാൾ വിശ്വസിക്കുന്നു
അയാൾ ഒരു
കൂമനെ വളർത്തുന്നു
ദുരൂഹമായ പാതിരകളിൽ
അലാറം വെച്ചുണർത്താൻ
അത് കൂട്ടുനിൽക്കുമെന്ന്
അയാൾ കരുതുന്നു
അങ്ങനെ
അങ്ങനെ
ഇനി ഒരു പത്രപരസ്യമാണ് :
വളർത്തു മൃഗങ്ങൾക്ക്
യഥാവിധി മാർഗ്ഗ നിർദ്ദേശങ്ങൾ നൽകാൻ
ഒരു മനുഷ്യനെ ആവശ്യമുണ്ട് എന്ന് .
അത് അയാൾ
ഫേസ് ബുക്കിലും
വാട്സ് അപ്പിലും
ഇൻസ്റ്റാഗ്രാമിലും ഇട്ട്
കാത്തിരിക്കുന്നു
