എന്നേക്കുമായെന്ന്
പിണങ്ങിപ്പോയവൾക്ക്,
ഞാൻ കാണില്ലെന്ന് കരുതി
നീയടച്ചിട്ട വാതിലുകളൊക്കെ
ഇതാ എനിക്ക് മുന്നിൽ
മലർക്കെ തുറന്നു കിടക്കുന്നു.
ഇടമതിൽ വിടവുകളിൽ
പാറകൾ പൊടിഞ്ഞിരിക്കുന്നു.
എന്നിൽ നിന്നേ നിനക്ക്
പോകാൻ കഴിയൂ,
നിന്നിൽ നിന്ന് എനിക്ക്
തീരെ പോകേണ്ടെങ്കിലോ.
നീയറിഞ്ഞുവോ ,
ഞാൻ കാണാതെ ഒളിപ്പിച്ച
നിന്റെ മയിൽപീലിച്ചെപ്പുകൾ
ഏത് സൂര്യനാണ്
എനിക്ക് കാട്ടിത്തന്നതെന്ന് ,
ഏത് നിശകളിൽ നിന്നാണ്
നിന്റെ നിലാവിനെ ഞാൻ
അടർത്തിയെടുത്തതെന്ന് ,
ഏത് പേമാരികളിൽ നിന്നാണ്
നിന്റെ നീർത്തുള്ളികളെ
ഞാൻ വേർതിരിച്ചതെന്ന്,
ഏത് ചവർപ്പുകളിൽ നിന്നാണ്
നീയെന്ന മധുരം ഞാൻ
തൊട്ടെടുത്തതെന്ന്.
നിന്നെയോർക്കുമ്പോൾ
ആർദ്രമാകുന്ന ഹൃദയം
തുളുമ്പുന്ന മിഴികൾ
നാം വാക്കുകൾ കൊണ്ട്
മുറിപ്പെട്ടവർ
ഇന്നും തമ്മിൽ വഴി
മറന്ന യാത്രികർ……
