![bindu-thejus-2024](https://thasrak.com/wp-content/uploads/2024/10/bindu-thejus-2024-696x456.jpg)
മരണ വ്യാപാര നഗരത്തിലൊരുവൻ
കനൽപ്പൊട്ടിന് കാവലിരിക്കുന്നു
തീ വിറ്റ് ജീവന് ചൂട് പകരുന്നു
കുട്ടികളും കുടുംബവും തീ പൂട്ടുന്നു
പശിയടക്കി ഉറങ്ങുന്നു
തീ പിടിച്ച വിലയാണ് ഈ തീയ്ക്കെന്നും
അണഞ്ഞു പോകാതെ കാത്തു വയ്ക്കുന്ന,
കാലങ്ങളായി കെടാതിരിക്കുന്ന
ഈ കനൽത്തരിയില്ലാതിവിടെ
ചിതകളെരിയുകില്ല എന്നുമറിയുമ്പോൾ
തീ കാറ്റെടുത്തോടുന്ന ചാര പൊട്ടുകളെക്കാൾ
ജീവനാകുന്നു .
ശവദാഹങ്ങളില്ലാത്ത മോക്ഷസ്ഥലികൾ
ആത്മാവുകളുടെ അനാഥ മന്ദിരങ്ങളാവുന്നു .
അവസാനമില്ലാത്ത മോഹങ്ങളുടെ
അഭയ സ്ഥാനമാകുന്ന മണികർണ്ണികാ ഘട്ടങ്ങൾ !
അസ്വസ്ഥതയുടെ കനൽ കടുപ്പം പോലെ
തീ അടയാളപ്പെടുത്തുന്ന ജീവിതങ്ങൾ
ആയുസ്സിന്റെ കാണാ ചങ്ങലകളിലൂടെ
ആയിരക്കണക്കിന് വർഷങ്ങളായി
ജീവിക്കുന്ന ആചാരക്കണ്ണികൾ !
കെട്ടുപോകാത്ത തീ സൂക്ഷിക്കുന്നത്
ദാരിദ്ര്യത്തിന്റെ ചൂടിൽ
പൊലിഞ്ഞു പോകാതിരിക്കാനാണത്രേ.
വിലപേശി വിൽക്കുന്ന മരണ സഹായം
വിലാപത്തെക്കാൾ ദാരുണമായ ,
കൈനീട്ടി വാങ്ങുന്ന ശവദാഹ കൂലിപോലെ
അകലെ തീ പുകയുന്ന വീട് !
![](https://thasrak.com/wp-content/uploads/2024/10/bindu-thejus-2024.jpg)