ട്രാക്ടറുകൾ പിഴുതെടുത്ത
പ്രാണന്റെ മുന്നിലാണ്
ഞാൻ
എന്റെ കൊയ്ത്തുപാട്ടുകൾ സമർപ്പിച്ചത്.
ആണ്ടിലധികം നീണ്ട
സമരകാഹളത്തിന്റെ ഈണത്തിലാണ്
എന്റെ ആദ്യകവിത പിറന്നത്.
മോഷണക്കുറ്റത്തിന്
വധശിക്ഷ വിധിക്കുന്ന
ആൾക്കൂട്ടക്കോടതിയെകണ്ട്
ഭയന്നുപോയിട്ടുണ്ട്.
വിശപ്പ് അവർക്ക് വൈറലാകാനുള്ള
അത്ഭുതം മാത്രമാണ് .
ഊണിന്റെയും ഉടുപ്പിന്റെയും
ഘടനചികയുന്ന കോടതികളിൽ
ഇഷ്ടങ്ങൾക്കായി
നിലവിളിക്കേണ്ടി വന്നിട്ടുണ്ട്.
എന്റെ ഇടവഴികൾ
എന്നെ തിരിച്ചറിയുമെന്നും ,
എന്റെ ഗ്രാമം
എനിക്ക് പൊറുതി തരുമെന്നും
പൗരത്വക്കോടതിയിൽ
ബോധിപ്പിക്കേണ്ടിവന്നിട്ടുണ്ട്.
കോടതിമുറി നിശബ്ദമായപ്പോൾ
അവർവന്നത് കൈവിലങ്ങുമായാണ് .
ഞാൻ പറഞ്ഞതിൽ പകുതിയും
നിരോധിക്കപ്പെട്ട പദങ്ങളായിരുന്നു.
