കാലങ്ങളേറെ കഴിഞ്ഞു നാം കണ്ടതും
കാണാതെയെങ്ങോ കുതിച്ചിടുന്നു
കണ്ടിട്ടും കാണാതെപോകയാണോ സഖേ
കണ്ടിട്ടുനാളുകളെത്രയായി ?
നേരമില്ലാ സഖേനിന്നോടു മിണ്ടുവാന്‍
വേറെനാള്‍ കാണാം നമുക്കുപിന്നെ
നേരമില്ലാ സഖേയേറെപണികളാല്‍ …!
നേരെ നോക്കിടാന്‍ സമയമില്ല
ഒന്നിനും നേരമില്ലാത്തൊരു കാലമോ ?
ഓടുന്നതെങ്ങോട്ടിതിത്ര വേഗം
ഓടിക്കളിച്ചു നടന്നൊരു ബാല്യത്തില്‍
ഒക്കേനും നേരമുണ്ടായിരുന്നു
രാവിലെയുച്ചയ്ക്കു വൈകീട്ടുരാത്രിയും
വാട്സപ്പിലേറണം ചാറ്റീടണം
എഫ് ബിയില്‍ ട്വിറ്ററില്‍ സ്റ്റാറ്റസ് അപ്ഡേറ്റു
ചെയ്കാകിലെന്തോ കുറവുപോലെ
ഊണുമുറക്കമുപേക്ഷിച്ചീടുകിലും
ഉറ്റവര്‍ തോഴരെ കൈവിടില്ല
ഉറ്റവരാണത്രെയീവക ‘ആപ്പുകള്‍’
ഉറ്റവരാരാണു ചിന്തിച്ചിടൂ !
ഒന്നിച്ചിരിക്കാനുമൊന്നുചിരിക്കാനും
ഒന്നിങ്ങുമിണ്ടാനും നേരമില്ല
തൊട്ടരികെയിരിക്കുന്ന നേരത്തും
തൊടുകയേയില്ല മനസ്സുതമ്മില്‍ !
ഒന്നിനും നേരമില്ലെന്നോർത്തുനോക്കൂ
ഒന്നു സ്നേഹിക്കുവാന്‍ നേരമുണ്ടോ ?
കഷ്ടമിതാം ലോകനിലയെന്നു വന്നാലോ
കഷ്ടമെന്നല്ലാതെമറ്റെന്തുചൊല്ലാന്‍ !
