ഉന്മാദിയായി ഉറങ്ങുന്നു / ഉണരുന്നു
വിഷാദിയായി ഉണരുന്നു / ഉറങ്ങുന്നു
അരാജകവാദികളായ സുഹൃത്തുക്കൾ,
ആത്മാവിൽ ആയുർരേഖയിൽ
മുറിവുണങ്ങാത്ത ബലിമൃഗങ്ങൾ
അവർക്ക്‌
ഉറങ്ങുന്നനേരം രാത്രി
ഉണരുന്നനേരം പുലർച്ച
ഉടൽ തന്നെ വസ്ത്രം
ഇരതേടുന്നതിനും
ഇണചേരുന്നതിനും
നിയമങ്ങളില്ലാത്ത
അതിരുകളില്ലാത്ത രാജ്യം
ഭയത്തെപ്പോലും ഭയമില്ലാതെ
സൗഹൃദം നുരയുന്ന
ബൊഹിമിയൻ വൈകുന്നേരങ്ങളിലേക്ക്
ഇന്നലെകളിലേക്ക് ക്ഷണിക്കുന്നു
വരൂ നമുക്ക് പോകാം
കൈകൾ പിടിക്കാം
ചേർന്ന് നിൽക്കാം നടക്കാം
മുറിച്ചൊരാ-
മരക്കൊമ്പിൻ കൂട്ടിലെ
കിളിപ്പാട്ട് കേൾക്കാം
ആകാശ ശിഖരത്തിൽ
മധുരകനി തേടാം
കാട്ടുതീ നക്കിതുടച്ച
തണലിൽ കിടക്കാം
വറ്റിയൊരാ പുഴയിൽ മുങ്ങാം
അതിൽ ചിലർ
മരണച്ചിറകിൽ പറന്നുപോയവർ
അവർക്കൊപ്പം
ഇന്നില്ലാത്തതിൻ്റെ
പരിമിതി മറികടക്കാം
