നിനക്ക് സൗഖ്യമോ?
സുവർണ്ണ പാദുക-
ക്കഥപറഞ്ഞെൻ്റെ
അടുത്തു വന്നു നീ.
കിനാക്കളിൽ നിൻ്റെ
തിളങ്ങും കണ്ണിലെ-
കുരുന്നു നക്ഷത്ര-
ച്ചിരി ഞാനും കണ്ടു,
രഥമേറി രാജ-
കലകളിൽ സൂര്യ-
കിരണവുമായി
വരുന്നൊരാൾക്കായി,
മിഴിയിൽ ബാല്യത്തിൻ
നനുന്തു ചില്ലയിൽ
കസവുനൂൽ ചിത്രം
പലത് തുന്നവേ!
വരും, വരുമെന്ന്
ചിരിച്ചുവോ സ്വപ്ന-
ച്ചിറകുള്ള പൂക്കൾ
വയലിൻ കാറ്റുകൾ.
നിലാവിൻ മുറ്റത്ത്
ശരറാന്തൽ തിരി-
തെളിച്ച് നീങ്ങിയ
പഴയ സിൻഡ്രെല്ലേ!
ഒരു നാളിൽ ബാല്യ-
കുതൂഹലങ്ങളിൽ
ചിരിയുതിർത്തുന്ന
കഥകളിലൊന്നിൽ
പഴയ ഗ്രാമത്തിൻ
ചുമന്ന മണ്ണിൻ്റെ
സുഗന്ധമേറ്റുന്ന
മഴത്തുള്ളി പോലെ
ഒരു സിൻഡ്രെല്ലയായ്
ഒരുങ്ങി നിന്നതും
മരത്തിനോടെന്നും
കഥപറഞ്ഞതും
ഇരുണ്ട ചാരത്തി-
ന്നടുക്കളക്കനൽ-
ത്തരികളിൽ പയർ-
മണി തിരഞ്ഞതും
മരമുതിർക്കുന്ന
തിളങ്ങും പട്ടിനായ്
ദിവസവും ജലം
പകർന്ന കാലവും..
അറിയൂ സിൻഡ്രെല്ലേ!
ചിരസ്മൃതിയുമായ്
ചിറകിലായ് ചിത്ര-
ശലഭവർണ്ണങ്ങൾ
മിഴികളിൽ മിന്നാ-
മിനുങ്ങിൻ്റെ വെട്ടം.
