ഏതൊരു നാട്ടിൽച്ചെന്നാലും കാര്യങ്ങൾ സുഗമമാകാൻ ഭാഷ ഒരു പ്രധാന ഘടകമാണ്. ഇവിടെ, ഈജിപ്തിൽ ഔദ്യോഗികവും ഏറ്റവും കൂടുതൽ ആളുകൾ സംസാരിക്കുന്നതുമായ ഭാഷ ഈജിപ്ഷ്യൻ അറബിയാണ്. വിദ്യാലയങ്ങളിൽ ഇംഗ്ലീഷ് ഭാഷപഠിപ്പിക്കുന്നുണ്ട്. ടൂറിസം ആവശ്യങ്ങൾക്കായി ഏറ്റവും കൂടുതൽ ഉപയോഗിക്കുന്ന ഒരു ദ്വിതീയ ഭാഷയായി ഇംഗ്ലീഷ് കണക്കാക്കപ്പെടുന്നു. ഈജിപ്തിന്റെ ഔദ്യോഗിക കറൻസി ഈജിപ്ഷ്യൻ പൗണ്ട് ആണ്. സ്വർണ്ണ മണൽ ബീച്ചുകളും വാസ്തുവിദ്യയും പ്രകൃതി ചികിത്സകളും ഒക്കെയിവിടെ സഞ്ചാരികളെ കാത്തിരിക്കുന്നു. പുരാതന ഈജിപ്ത് ലോകത്തിലെ ഏറ്റവും രസകരവും പഴക്കമുള്ളതുമായ നാഗരികതകളിൽ ഒന്നാണ്. പുരാതന ഈജിപ്ഷ്യൻ പ്രതിമകളും ശവകുടീരങ്ങളും നിലനിൽക്കുന്ന ഗിസയിലെ ഗ്രേറ്റ് പിരമിഡുകൾ പുരാവസ്തു ഗവേഷകരുടെയും ലോകത്തിന്റെയും ശ്രദ്ധ പിടിച്ചുപറ്റുന്നു. ഇപ്പോഴും പുരാതന ഈജിപ്ഷ്യൻ നാഗരികതയുടെ അവശിഷ്ടങ്ങൾ കണ്ടെത്തുന്നത് തുടർന്നുകൊണ്ടിരിക്കുന്നു. ലോകത്തിലെ ഏറ്റവും നീളം കൂടിയ നദിയായ നൈൽ ഏകദേശം 6,695 കിലോമീറ്റർ സഞ്ചരിച്ച് മെഡിറ്ററേനിയനിലേക്കു ഒഴുകുന്നു.
ലക്സറും അസ്വാനും ആണ് നൈൽ നദീതീരത്തെ പ്രധാന പട്ടണങ്ങൾ. ഭൂമിയിലെ ഏറ്റവും മികച്ച ഇസ്ലാമിക വാസ്തുവിദ്യയും കെയ്‌റോയിലുണ്ട്. 1,200 വർഷമായി നിലനിൽക്കുന്ന മസ്ജിദുകൾ, പ്രത്യേകിച്ചും ഇബ്നു തുലൂണിന്റെ മസ്ജിദ്, മുഹമ്മദ് അലിയുടെ പള്ളി, സുൽത്താൻ ഹസന്റെ മസ്ജിദ്-മദ്രസ എന്നിവയും പ്രധാന കാഴ്ചകളാണ്. ഈജിപ്ഷ്യൻ ഭക്ഷണത്തിൽ മിഡിൽ ഈസ്റ്റിലെ അയൽരാജ്യങ്ങളുടെ സ്വാധീനം കാണാൻ കഴിയും. വളരെ രുചിയേറിയതാണ് ഇവിടുത്തെ ഭക്ഷണം. ഈജിപ്തിൽ ചികിൽസാടൂറിസം വളരെക്കാലമായി പ്രചാരത്തിലുണ്ട്. ഇവിടെയുള്ള ചൂടുനീരുറവകൾ ശ്വാസകോശസംബന്ധമായ അസുഖങ്ങൾ, വൃക്ക, അസ്ഥിരോഗങ്ങൾ, ചർമ്മ പ്രശ്നങ്ങൾ എന്നിവയെ സുഖപ്പെടുത്താൻ സഹായിക്കുന്നു. പല പ്രദേശങ്ങളിലെയും ചെളി ചർമ്മപ്രശ്നങ്ങൾക്കു പരിഹാരമാകുമെന്നും പറയപ്പെടുന്നു. മണൽ കുഴച്ച് ദേഹത്തിൽ ഇടുന്ന മസാജുകൾ ഈജിപ്തിലും പ്രചാരത്തിലുണ്ട്, ഇത് പരിക്കുകൾക്കുള്ള ചികിത്സയാണെന്നു പറയപ്പെടുന്നു. ഇവിടെ, ഈജിപ്തിൽ പ്രാദേശികമായ അനവധി വൈചാത്യങ്ങൾ എല്ലാക്കാര്യങ്ങളിലും ദർശിക്കാം. സംസാരഭാഷയിലെ വ്യത്യസ്തമായ ഉച്ചാരണങ്ങൾ, പ്രാദേശിക രുചിഭേദങ്ങളോടുകൂടിയ ഭക്ഷണം, പാരമ്പര്യ ആചാരങ്ങളിലെ വ്യത്യസ്തത എന്നു തുടങ്ങി, ഏത് നഗരത്തിൽ നിന്നുള്ളവരാണ് എന്നതിനെ ആശ്രയിച്ച് വ്യത്യസ്ത ഫാഷനുകൾ പോലുമുണ്ട്. ഇത്രയും മനോഹാരമായ ഈജിപ്തിലൂടെയുള്ള സഞ്ചാരം നമ്മളെ വിസ്മയിപ്പിക്കുമെന്നതിൽ തർക്കമില്ല.
ഈജിപ്തിന്റെ മാറിലൂടെ സഞ്ചരിക്കുമ്പോൾ അതിശയിപ്പിക്കുന്നതരം ചരിത്ര കഥകൾ കേൾക്കാൻ കഴിയും. മാസിഡോണിയൻ ഭരണാധികാരിയായിരുന്ന മഹാനായ അലക്സാണ്ടർ, ബിസി 332-ൽ ഈജിപ്ത് കീഴടക്കി, ഇത് ഈജിപ്ഷ്യൻ ജനതയ്ക്കും ദേശങ്ങൾക്കും പ്രത്യേകിച്ചും അലക്സാണ്ട്രിയ നഗരം സ്ഥാപിച്ചതിനുശേഷം നിരവധി നേട്ടങ്ങൾ കൊണ്ടുവന്നു. ആധുനിക ഈജിപ്ത് 1953-ൽ സ്ഥാപിതമായി. ഈജിപ്തിനെ യഥാർത്ഥത്തിൽ മനോഹരവും അതുല്യവുമായ ഒരു രാജ്യമാക്കുന്നതിനുള്ള പ്രധാനകാരണം ഇവിടുത്തെ ഭരണാധികാരികളായ ഫറോവമാരുടെ കഥകളാണ്. ഈജിപ്തിലെ മഹാനായ ഭരണാധികാരികളായ ഫറോവമാർ ഈജിപ്തിന്റെ ചരിത്രത്തിൽ ഒന്നാം രാജവംശം മുതൽ ആധുനിക ഈജിപ്ത് രൂപീകരിക്കുന്നതു വരെ വളരെയധികം സ്വാധീനിച്ചതായിക്കാണാം. പുരാതന ഈജിപ്തുകാർ ധാരാളം കണ്ടുപിടുത്തങ്ങൾ നടത്തിയിട്ടുണ്ട്. ഗ്ലാസ്, ശരീരഘടനയെയും വൈദ്യശാസ്ത്രത്തെയും കുറിച്ചുള്ള അറിവ്, കലണ്ടറിന്റെ കണ്ടുപിടിത്തം, അളവെടുപ്പിന്റെ നിലവാരം, പാപ്പിറസ് ചെടിയിൽ നിന്നുള്ള പേപ്പർ നിർമ്മാണം എന്നിവയിൽ അവർ പ്രശസ്തരായിരുന്നു.
ഈജിപ്തിലെ മനോഹരമായ കാഴ്ചകളെ തൊടുമ്പോൾ, എന്നെ ഏറെ ആഹ്ലാദിപ്പിച്ച കെയ്‌റോയിലെ പ്രധാന ആകർഷണങ്ങളിൽ ചിലത് പറയാതെ വയ്യ. അൽ-അസ്ഹർ മസ്ജിദ്, മുഹമ്മദ് അലി മസ്ജിദ്, തുടങ്ങി മറ്റ് നിരവധി മുസ്ലിം പള്ളികൾ നയന മനോഹരങ്ങളാണ്. ഹാംഗിംഗ് ചർച്ച്, കേവ് ചർച്ച് എന്നും അറിയപ്പെടുന്ന സെന്റ് സൈമൺ ചർച്ച്, മാഡിയിലെ സെന്റ് മേരീസ് ചർച്ച്, സെന്റ് മാർക്ക് കോപ്റ്റിക് ഓർത്തഡോക്സ് ചർച്ച്, ചർച്ച് ഓഫ് ദി വിർജിൻ മേരി തുടങ്ങിയ ചർച്ചുകളും മനസ്സിൽ മായാതെ കിടക്കുന്നു. മ്യൂസിയത്തിൽ ശവകുടീരങ്ങൾ, മമ്മിഫിക്കേഷൻ ചെയ്യുന്ന പ്രക്രിയ കൗതുകം തന്നെ. ഇനി ഗിസയിലക്ക് നോക്കിയാൽ, ഗിസ ഈജിപ്തിന്റെ ഭാഗം മാത്രമാണെങ്കിലും, ഗിസ പിരമിഡ് കോംപ്ലക്‌സ്, വാലി ടെമ്പിൾ എന്നിവയെല്ലാം വളരെ നിഗൂഢമായ പുരാതന ഈജിപ്ഷ്യൻ ആചാരങ്ങളും പാരമ്പര്യങ്ങളുമായി ബന്ധപ്പെട്ടു കിടക്കുന്നവയാണ്.
ലക്സർ അസ്വാൻ എന്നീ വളരെ പ്രധാനപ്പെട്ട രണ്ട് സ്ഥലങ്ങളിലാണ് പിന്നെ ഞാൻ പോയത്. ഈ രണ്ട് നഗരങ്ങളും പുരാതനമാണ്. ചേതോഹരമായ വാലി ഓഫ് ദി കിംഗ്സ്, ലക്സർ & കർണാക് ക്ഷേത്രങ്ങൾ തുടങ്ങി സിംബെൽ ക്ഷേത്രങ്ങൾ, പൂർത്തിയാകാത്ത ഒബെലിസ്ക്, ഫിലേ ക്ഷേത്രം എന്നിവ കാണാൻ കഴിയുന്ന നൂബിയൻ നഗരം കൂടിയാണ് അസ്വാൻ. ഈജിപ്ത് സന്ദർശിക്കാനുള്ള അവസരത്തിൽ ഭാഗ്യമായി കരുതിയത് ചെങ്കടലിനു കുറുകെയുള്ള ഉഷ്ണമേഖലാ സൗന്ദര്യം ആസ്വാദിച്ചപ്പോഴാണ്. നല്ല കാലാവസ്ഥയും മനോഹരമായ കടൽത്തീരങ്ങളും അതിശയിപ്പിക്കുന്ന മരുഭൂമികളും ഹർഗദയെ വിനോദസഞ്ചാരികളുടെ പ്രധാന ലക്ഷ്യസ്ഥാനങ്ങളായി മാറിയിരിക്കുന്നു.
പിരമിഡുകളെക്കുറിച്ചൽപ്പം
ഇതുവരെ നിർമ്മിച്ചതിൽ വച്ച് ഏറ്റവും വലുതാണ് ഗ്രേറ്റ് പിരമിഡ്. ഇതിന് യഥാർത്ഥത്തിൽ 482 അടി ഉയരമുണ്ടായിരുന്നു, പക്ഷേ മണ്ണൊലിപ്പും മിനുക്കിയ ചുണ്ണാമ്പുകല്ല് പാളികൾ നീക്കം ചെയ്തതും വഴി പിരമിഡിന്റെ ഉയരം 449 അടിയായി കുറഞ്ഞുവത്രേ. ഗ്രേറ്റ് പിരമിഡിന്റെ അകം മഞ്ഞകലർന്ന ചുണ്ണാമ്പുകല്ലുകൾ കൊണ്ടാണ് നിർമ്മിച്ചിരിക്കുന്നത്. കൂറ്റൻ കരിങ്കല്ലുകൾ കൊണ്ടാണ് ശ്മശാനഅറ നിർമ്മിച്ചിരിക്കുന്നത്. 5.75 ദശലക്ഷം ടൺ ഭാരമുള്ള ഘടന സൃഷ്ടിക്കാൻ ഏകദേശം 2.3 ദശലക്ഷം കല്ലുകൾ മുറിച്ച് കൂട്ടിച്ചേർക്കുകയും ചെയ്തിട്ടുണ്ട്. ഇത് സാങ്കേതിക വൈദഗ്ധ്യത്തിന്റെയും എഞ്ചിനീയറിംഗ് കഴിവിന്റെയും മികച്ച സൃഷ്ടിയാണ്. പുരാതന ഈജിപ്തിൽ കാണപ്പെട്ട മറ്റേതൊരു കൊത്തുപണികളേക്കാളും മികച്ച രീതിയിലാണ് പിരമിഡിൻ്റെ അകത്തെ ഭിത്തികളും അതുപോലെ തന്നെ അവശേഷിക്കുന്ന ഏതാനും പുറം പാളികളും നിർമിച്ചിരിക്കുന്നത്. ഗ്രേറ്റ് പിരമിഡിന്റെ പ്രവേശന കവാടം വടക്കുഭാഗത്താണ്, ഭൂനിരപ്പിൽ നിന്ന് ഏകദേശം 59 അടി ഉയരത്തിലാണ് ഇത് നിൽക്കുന്നത്. വളരെ വലുതാണെങ്കിലും, പിരമിഡിന് ഉള്ളിൽ തുറസ്സായ ഇടം കുറവാണ്.
പിരമിഡ് ഘടന നിലനിൽക്കുന്ന പാറ, മണ്ണിലേക്ക് തുളച്ചുകയറുകയും പൂർത്തിയാകാത്ത ഭൂഗർഭ അറയിൽ അവസാനിക്കുകയും ചെയ്യുന്നു. ഇറങ്ങുന്ന ഇടനാഴി ശാഖകളിൽ നിന്ന് ക്വീൻസ് ചേംബർ എന്നറിയപ്പെടുന്ന ഒരു മുറിയിലേക്കും ഗ്രാൻഡ് ഗാലറി എന്നറിയപ്പെടുന്ന വലിയ ചരിഞ്ഞ പാതയിലേക്കും നയിക്കുന്ന ഒരു കോർബെൽ പാതയുമുണ്ട്. ഗ്രാൻഡ് ഗാലറിയുടെ മുകളിലെ അറ്റത്ത്, നീളമുള്ളതും ഇടുങ്ങിയതുമായ ഒരു പാത ശവകുടീരത്തിലേക്കു നയിക്കുന്നു. ഇതിനെ സാധാരണയായി കിംഗ്സ് ചേംബർ എന്ന് വിളിക്കുന്നു. ഈ മുറി പൂർണ്ണമായും ഗ്രാനൈറ്റ് കൊണ്ടുള്ളതാണ്. അറയിൽ നിന്ന് രണ്ട് ഇടുങ്ങിയ ഷാഫ്റ്റുകൾ പിരമിഡിന്റെ പുറംഭാഗത്തേക്ക് പോകുന്നുണ്ട്. അവ മതപരമായ ആവശ്യത്തിനാണോ അതോ വായുസഞ്ചാരത്തിനാണോ ഉദ്ദേശിച്ചതെന്ന് അറിയില്ല. പിരമിഡ് എങ്ങനെ നിർമ്മിച്ചു എന്നതിനെക്കുറിച്ചുള്ള ചോദ്യങ്ങൾ ഇന്നും നിലനിൽക്കുന്നു. സ്ലെഡ്ജുകൾ, റോളറുകൾ, ലിവർ എന്നിവ ഉപയോഗിച്ച് കല്ലുകൾ റാംപിലേക്ക് വലിച്ചിഴച്ചു കൊണ്ടാകണം ഈ നിർമ്മിതി പൂർത്തിയാക്കിയത്. പുരാതന ഗ്രീക്ക് ചരിത്രകാരനായ ഹെറോഡോട്ടസിന്റെ അഭിപ്രായത്തിൽ, ഗ്രേറ്റ് പിരമിഡ് നിർമ്മിക്കാൻ ഇരുപത് വർഷമെടുത്തുവത്രെ. കൂടാതെ 100,000 ആളുകളുടെ അധ്വാനം ആവശ്യമായിരുന്നു. ഞാൻ പിരമിഡ് കൺകുളിർക്കെ കണ്ട് തിരികെ വന്നു. എന്നെത്തന്നെ എനിക്ക് വിശ്വസിക്കാനാകാത്തതു പോലെ ചരിത്രങ്ങളിൽ നിറഞ്ഞ് തുളുമ്പി നിൽക്കുന്നതും രാജാക്കന്മാർ നടന്നിരുന്നതുമായ വഴിയിലൂടെ നടന്നുവെന്ന് എനിക്കും ഇനി അഭിമാനത്തോടെ പറയാൻ കഴിയും.
മിഡിൽ ഈസ്റ്റിലെ ഏറ്റവും പഴക്കം ചെന്ന പുരാവസ്തു മ്യൂസിയമാണ് ഈജിപ്ഷ്യൻ മ്യൂസിയം. അവിടം എന്നെ വല്ലാതെ ആകർഷിച്ചു. ലോകത്തിലെ ഏറ്റവും വലിയ ഫറവോൻ പുരാവസ്തുക്കളുടെ ശേഖരം ഇവിടെയുണ്ട്. പ്രിഡൈനാസ്റ്റിക് കാലഘട്ടം മുതൽ ഗ്രീക്കോ-റോമൻ കാലഘട്ടം വരെയുള്ള വിപുലമായ ശേഖരം മ്യൂസിയത്തിൽ പ്രദർശിപ്പിച്ചിരിക്കുന്നു. ഇത് കെയ്‌റോ നഗരത്തിന്റെ പ്രൗഢി വിളിച്ചോതുന്നുണ്ട്., ലോകത്തിലെ ഏറ്റവും പുരാതനമായ മാസ്റ്റർപീസുകളുടെ ആസ്ഥാനമായി മ്യൂസിയം മാറിയിരിക്കുന്നു. യുയയുടെയും തുയയുടെയും ശ്മശാനങ്ങൾ, സ്യൂസെന്നസ് I, ടാനിസിന്റെ നിധികൾ, അപ്പർ, ലോവർ ഈജിപ്ത് ഒരു രാജാവിന്റെ കീഴിൽ ഏകീകരിക്കപ്പെട്ടതിനെ അനുസ്മരിക്കുന്ന നർമർ പാലറ്റ് എന്നിവ മ്യൂസിയത്തിന്റെ അമൂല്യമായ പുരാവസ്തുക്കളിൽപ്പെടുന്നു. ഗിസ പീഠഭൂമിയിലെ പിരമിഡുകളുടെ നിർമ്മാതാക്കളായ ഖുഫു, ഖഫ്രെ, മെൻകൗരെ എന്നിവരുടെ പ്രതിമകളും മ്യൂസിയത്തിലുണ്ട്. പാപ്പിരി, സാർക്കോഫാഗി, ആഭരണങ്ങൾ എന്നിവയുടെ വിപുലമായ ശേഖരവും ഇവിടുണ്ട്.
മ്യൂസിയത്തിലേക്ക് പ്രവേശിക്കുമ്പോൾ പ്രധാന ആകർഷണങ്ങളിലൊന്ന് രാജകീയ ദമ്പതികളായ അമെൻഹോടെപ് മൂന്നാമനെയും അദ്ദേഹത്തിന്റെ ഭാര്യ ടിയെയെയും അവരുടെ മൂന്ന് പെൺമക്കളെയും ചിത്രീകരിക്കുന്ന ഭീമാകാരമായ പ്രതിമയാണ്. ഇതുവരെ കൊത്തിയെടുത്ത അറിയപ്പെടുന്ന പുരാതന ഈജിപ്ഷ്യൻ കുടുംബ ഗ്രൂപ്പിന്റെ ഏറ്റവും വലിയ പ്രതിമയാണിത്. ഇത് അമെൻഹോടെപ് മൂന്നാമന്റെ ഭരണകാലത്താണ് ഉണ്ടാക്കിയിട്ടുള്ളത്. ഈ പ്രതിമയുടെ മുന്നിൽ നിന്ന് ഒരു ചിത്രമെടുക്കാൻ ഞാൻ മറന്നില്ല. അവിടെ നിന്നും ഞാൻ 40 കിലോമീറ്റർ സഞ്ചരിച്ച് തെക്കുപടിഞ്ഞാറായി സ്ഥിതി ചെയ്യുന്ന സഖാറയിലേക്ക് പോയി. പുരാതന ഈജിപ്ഷ്യൻ ചരിത്രത്തിലെ ഏറ്റവും പ്രധാനപ്പെട്ട നഗരങ്ങളിലൊന്നായ മെംഫിസിലെ പ്രധാന സെമിത്തേരികളിൽ ഒന്നാണ് ഇവിടം. പുരാതന ഈജിപ്ഷ്യൻ ചരിത്രങ്ങളെല്ലാം പ്രദർശിപ്പിച്ചിരിക്കുന്ന സഖാര യഥാർത്ഥത്തിൽ ഒരു ഓപ്പൺ എയർ മ്യൂസിയമാണ്. ആദ്യത്തെ രണ്ട് രാജവംശങ്ങളിലെ രാജാക്കന്മാരും പ്രഭുക്കന്മാരും ഇവിടെ അടക്കം ചെയ്യപ്പെട്ടിരുന്നു, കൂടാതെ ഡിജോസറിന്റെ സ്റ്റെപ്പ് പിരമിഡിന്റെ സ്ഥാനവും ഇവിടെയാണ്.
(ഇനിയുമുണ്ട് പറയാൻ. അത് അടുത്ത ഭാഗത്തിൽ )
