ഇനി വരുമ്പോഴേക്കും
ചെടിയാകാൻ വെച്ചത്
മരമായിട്ടുണ്ടാകും.
ചേർത്തു ചേർത്തു നട്ടത്
ഒറ്റക്കാൽ നൃത്തം പഠിക്കും.
ഉണങ്ങാൻ വെച്ച
മഴയൊക്കെയും
തോർന്നു പോകും.
ഒറ്റയ്ക്കൊറ്റയ്ക്ക്
വെയിലു കൊള്ളാൻ
പഠിക്കും .
ഇടയ്ക്ക് പൂക്കാനും
വല്ലപ്പോഴുമൊക്കെ
കായ്ക്കാനും
ഒറ്റയ്ക്കൊറ്റയ്ക്ക്
വീടുകെട്ടാനും പഠിക്കും.
തായ്ത്തടിക്ക്
കനം വെക്കും.
ചില്ലകൾ വളരും.
ഒറ്റയ്ക്കൊറ്റയ്ക്ക്
മരിച്ചു പോകാൻ പഠിക്കും.
കത്തുകൾ
കഥകൾ
നീണ്ടു നീണ്ടു പോകുന്ന
അവധിക്കാലങ്ങൾ .
പഠിക്കാത്തതൊക്കെയും
ഓർമ്മ വരുന്നു.
പഠിക്കാത്തതൊക്കെയും .
