ലൈംഗിക വിദ്യാഭ്യാസത്തിന്റെ അപര്യാപ്‌തത സമൂഹത്തിൽ എക്കാലത്തെയും വലിയ ഒരു പരാജയം ആണ് . മനുഷ്യർക്ക് മാത്രമാണ് ഇക്കാര്യത്തിൽ ഒരു അവബോധം നൽകേണ്ടി വരുന്നത് എന്നതാണ് ഏറ്റവും വലിയ തമാശയും. എല്ലാ മനുഷ്യർക്കും ഇതിന്റെ ആവശ്യമുണ്ട് എന്ന് തോന്നുന്നില്ല. പകരം പരിഷ്കൃത മനുഷ്യനെന്ന് എടുത്തു പറയേണ്ടി വരുന്നുണ്ട് . കാരണം ആഫ്രിക്കൻ വനാന്തരങ്ങളിൽ ഇന്നും വസ്ത്രം എന്നത് ഒരു തമാശക്കാര്യമായി കാണുന്ന, അതിനെക്കുറിച്ചു ബോധവരല്ലാത്ത സമൂഹങ്ങൾ ജീവിക്കുന്നുണ്ട് . അവർക്കിടയിൽ കുട്ടികൾ ജനിക്കുന്നുണ്ട്. വിവാഹം നടക്കുന്നുണ്ട്. ലൈംഗികത പ്രാകൃതമായ ഒരു തലത്തിൽ ആണെങ്കിലും സംഭവിക്കുന്നുണ്ട് . പക്ഷെ ലൈംഗിക പീഡനങ്ങൾ ആധുനിക സമൂഹത്തിലെ പരിഷ്കൃത ജനതയുടെ അത്രയും കഠിനമായി, ക്രൂരമായി നടക്കുന്നില്ല. ശരീരം എന്നത് ലൈംഗികതയ്ക്ക് വേണ്ടിയുള്ളത് ആണെന്ന ബോധം എന്തായാലും അവരിൽ ഇല്ല. അതിനാൽ തന്നെ വസ്ത്രം ധരിക്കാത്തതു കൊണ്ട് കുട്ടികൾ നഗ്നത കണ്ടു ചീത്തയായി പോകുന്നില്ല. പൊതു ജീവിതത്തിൽ നഗ്നത കണ്ടു ചാടി വീണു ലൈംഗിക അതിക്രമങ്ങൾ നടത്തുന്നില്ല . അതുപോലെ സദാനേരവും ലൈംഗികത എന്നൊരു ഒറ്റ ചിന്ത മാത്രം ശരീര ദർശനത്താൽ ഉണ്ടാകുന്നുമില്ല . ആഫ്രിക്കൻ വനാന്തരം വരെ പോകേണ്ട കാര്യമില്ല. ആന്റമാൻ ദ്വീപ സമൂഹങ്ങളിലെ ആദിവാസികൾ ആയ ജെരവകൾ വസ്ത്രം ധരിക്കാത്ത ആദിമ നിവാസികൾ ആണ് . ഇന്ത്യാ ഗവണ്മെന്റ് അവർക്ക് ആരോഗ്യ പരിരക്ഷയൊക്കെ നൽകുന്നുണ്ട്. ആഹാരം നൽകുന്നുണ്ട്. പക്ഷെ അവർ ഇപ്പോഴും പൊതു ജീവിത സമൂഹത്തിൽ പോലും വസ്ത്ര രഹിതരായി തന്നെ ഇടപഴകുന്നവർ ആണ് . അവരുടെ നഗ്നത കാണാൻ വണ്ടി വിളിച്ചു പോകുന്ന, ആസ്വദിക്കുന്ന, ചിത്രങ്ങൾ എടുത്തു നിഷ്ക്കു വേഷം കെട്ടി പങ്കു വച്ച് ആഘോഷിക്കുന്ന പരിഷ്കൃത മനുഷ്യർ ഉണ്ട് . മുലകൾ എന്നത് അവരുടെ ഇടയിൽ പരിപാവനമായ ഒന്നാണ്. കാരണം അത് കുഞ്ഞുങ്ങൾക്ക് പാൽ കൊടുക്കാൻ വേണ്ടിയുള്ള ഒന്നാണ് എന്ന ബോധം. പരിഷ്കൃത മനുഷ്യർ അത് സമ്മതിച്ചു തരില്ല . മുലകൾ ലൈംഗിക ചോദനയ്ക്കുള്ള വസ്തുതയാണ് എന്നും അത് കണ്ടാൽ പോലും ലൈംഗിക വിചാരം ഉണ്ടാകും എന്ന പൊതുബോധം ആണ് വിദ്യാഭ്യാസത്തിലൂടെ ആധുനിക മനുഷ്യർ നേടിയെടുത്തത്. എന്തിനു അന്യ ദേശങ്ങളിൽ പോയി ഉദാഹരണങ്ങൾ എടുക്കുന്നു . ഈ കേരളത്തിൽ പോലും കഴിഞ്ഞ നാല്പത് അമ്പതു വർഷങ്ങൾക്ക് മുൻപ് വരെ സ്ത്രീകൾ അരയിൽ ഒറ്റ മുണ്ടുടുത്തവർ ആയിരുന്നില്ലേ ? മാറ് മറയ്ക്കൽ, മുലക്കരം തുടങ്ങിയ ആയുധങ്ങളുമായി ഇപ്പോൾ എത്തും ചിലർ പ്രതിരോധിക്കാൻ. ആ വിഷയങ്ങളിലേക്ക് ഞാൻ കടക്കുന്നില്ല തത്കാലം . ഞാൻ പറയാൻ ശ്രമിക്കുന്നത് ആ സ്ത്രീകളുടെ വീടുകളിൽ അച്ഛനും സഹോദരരും മക്കളും ഉണ്ടായിരുന്നു . ആ വീടുകൾ എല്ലാം തന്നെയോ ആ കാലഘട്ടത്തിലെ ആണുങ്ങൾ എല്ലാം തന്നെയോ മുലകൾ കണ്ടു കാമം ജനിച്ചു പീഡിപ്പിക്കാൻ നടന്നവർ അല്ല . ധർമ്മരാജ എന്ന നോവലിൽ ആണെന്നാണ് ഓർമ്മ അമ്മാവൻ, സുഭദ്രയെ കോപം വന്നപ്പോൾ ശിക്ഷിക്കുന്നത് മുല പിടിച്ചു ഞെരിച്ചുകൊണ്ടാണ് . അതൊരു ശിക്ഷാ നടപടി എന്നതിനപ്പുറം കാമത്തോടെയുള്ള പ്രതികരണം അല്ലായിരുന്നു എന്നത് ആ കാലഘട്ടത്തിലെ കാഴ്ചപ്പാടിനെ മനസ്സിലാക്കിക്കാൻ ഉപകരിക്കും എന്ന് ചൂണ്ടിക്കാണിക്കാൻ ഉപയോഗിക്കാം.
ലൈംഗിക വിദ്യാഭ്യാസം എന്നാൽ എങ്ങനെ ലൈംഗിക ബന്ധം ചെയ്യണം എന്ന് പഠിപ്പിച്ചു കൊടുക്കൽ ആണ് എന്നും അതിനു ശ്രമിക്കുന്നത് ലജ്‌ജാകരവും കുട്ടികളെ തെറ്റുകളിലേക്ക് നടത്തുന്നത് ആണെന്നും ധരിച്ചുവശായ ഒരു സമൂഹമാണ് നമ്മുടേത്. .ഞാൻ എങ്ങനെ ജനിച്ചു, എവിടെ നിന്നും വന്നു എന്നുള്ള ക്ളീഷേ ചോദ്യങ്ങൾക്ക് പോലും ഉത്തരം ഇല്ലാതെ പോകുന്നവരെക്കുറിച്ചുള്ള വീഡിയോകൾ, മീമുകൾ, ട്രോളുകൾ ഒക്കെ സജീവമാണല്ലോ. വിവര സാങ്കേതിക വശങ്ങളുടെ പുതിയ കാലത്ത് കുട്ടികൾക്ക് ഒന്നും അറിയില്ല എന്ന് കരുതുന്ന രക്ഷകർത്താക്കൾ ആണ് വിഡ്ഢികൾ. പത്തു പതിനഞ്ചു കൊല്ലം മുൻപ് ഇന്ത്യാടുഡേ നടത്തിയ ഒരു സർവേയുടെ ഫലം അന്ന് വായിച്ചതോർമ്മ വരുന്നു. ഡൽഹിയിലെ ഒരു ചെറിയ ക്ലാസിലെ കുട്ടി , തന്റെ അധ്യാപിക ക്ലാസ്സിൽ ദേഷ്യം പ്രകടിപ്പിച്ചപ്പോൾ കുട്ടി സഹപാഠിയോട് പറഞ്ഞത് ടീച്ചർക്ക് ഇന്നലെ രാത്രി ശരിയായിക്കാണില്ല എന്നാണു. ഇതൊരൊറ്റപ്പെട്ട സംഭവമോ, അത്ഭുതപ്പെടുത്തുന്ന സംഗതിയോ അല്ല. ഇന്നത്തെ കുട്ടികൾക്ക് ഒന്നും പറഞ്ഞു കൊടുക്കേണ്ട ആവശ്യമില്ല എന്നും കരുതരുത് . കാരണം എല്ലാ ബാല്യങ്ങളെയും പോലെ അതാത് സമയത്തെ സാങ്കേതിക വശങ്ങൾ ഉപയോഗിച്ച് അവർ നേടുന്നത് അപക്വമായ അറിവുകളോ അശാസ്ത്രീയമായ അറിവുകളോ ആണ്. പണ്ട് കുട്ടികൾക്ക് അവരുടെ ഗുപ്തമായ സംശയങ്ങൾക്ക് മറുപടി ലഭിച്ചിരുന്നത് മുതിർന്ന ചേട്ടന്മാരോ ചേച്ചിമാരോ പകർന്നു കൊടുക്കുന്ന അറിവുകൾ ആണ് . അതല്ലെങ്കിൽ ഒളിഞ്ഞും പാത്തുമവർ വായിക്കുന്ന കൊച്ചു പുസ്തകങ്ങൾ . കുറച്ചു കൂടി കഴിഞ്ഞപ്പോൾ അവരുടെ ലൈംഗിക അറിവുകൾ സിനിമകളിലെ കളർ പ്രതലത്തിൽ കുറച്ചുകൂടി വിശാലവും കൂടുതൽ കുഴപ്പം പിടിച്ചതുമായി . ആംഗലേയ വീഡിയോകളുടെ അതിപ്രസരം നടന്ന കാലവും കടന്നു മൊബൈൽ ഫോൺ കാലഘട്ടം ആയപ്പോൾ ചെറിയ ചെറിയ ക്ലിപ്പുകൾ ആയ എം എം എസ് തലത്തിലേക്ക് വന്ന അത്തരം വീഡിയോകളിൽ കാണുന്ന ലൈംഗികത ആണ് ശരി എന്ന തെറ്റിദ്ധാരണ കുട്ടികൾക്ക് ഇടയിൽ വലിയ പ്രശ്നങ്ങൾ ഉണ്ടാക്കി . ലൈംഗികതയിലെ പരീക്ഷണങ്ങളും അവയവങ്ങളുടെ വലിപ്പവും മൈഥുനത്തിലെ സമയവും വീഡിയോ കണ്ടു ശരിയെന്ന ധാരണയിൽ ദാമ്പത്യ ജീവിതത്തിൽ പ്രശ്നങ്ങൾ സൃഷ്ടിക്കൽ തുടങ്ങിയത് ഇതോടെയാണ് എന്ന് കരുതുന്നു. ലൈംഗിക അവബോധം നൽകുന്ന സിനിമകളോ വീഡിയോകൾ അശ്ലീല ചിത്രങ്ങൾ എന്ന കാരണത്താൽ സമൂഹത്തിൽ വെളിച്ചത്തിൽ കാണേണ്ട സംഗതികൾ അല്ല എന്നൊരു ധാരണ പരത്തി. കേരളസമൂഹം ആണ് ഇന്ത്യയിൽ ലൈംഗികതയിൽ ഇത്രയേറെ ഗുപ്തവും ജുഗുപ്ത്സവഹവുമായ ഒരു സംഗതിയായി കാണാൻ , പഠിപ്പിക്കാൻ ശ്രമിച്ചത് എന്നൊരു തോന്നൽ ഉണ്ട് . ചുവന്ന തെരുവുകളും മറ്റുമുള്ള മറ്റു സംസ്ഥാനങ്ങളിൽ ലൈംഗികതയുടെ അന്വേഷണത്തിന് ഭയങ്ങൾ ഇല്ലാതെ ഒരു ഇടം ഉണ്ടെങ്കിൽ കേരളത്തിൽ അത് സദാചാര ഭ്രംശവും കുറ്റകൃത്യവും ആണല്ലോ .
ഡോക്ടർ ജെ. കെ. എഴുതിയ രതിയും ദാമ്പത്യവും എന്ന പുസ്തകം പ്രായപൂർത്തിയായ കുട്ടികൾക്കും ദമ്പതികൾക്കും ഒരുപോലെ ഉപയോഗമുള്ള ഒരു പുസ്തകം ആണ് . കൗമാരക്കാരായ കുട്ടികളിൽ ഉണ്ടാകുന്ന ലൈംഗിക അറിവുകളെ തിരുത്താനും ശരിയായി നയിക്കാനും ഈ പുസ്തകത്തിലെ വിവരങ്ങൾ സഹായിക്കും . ശരീരം എന്താണ് എന്നും ലൈംഗിക അവയവങ്ങളുടെ ധർമ്മമെന്തെന്നും തുടങ്ങി രതി എങ്ങനെ ആരോഗ്യകരമായ രീതിയിൽ ചെയ്യണം എന്നും പ്രധാനപ്പെട്ട ലൈംഗിക പ്രശ്നങ്ങൾ ആയ വിഷയങ്ങളെ എങ്ങനെ പരിഹരിക്കാം എന്നും ഒക്കെയുള്ള വിവരങ്ങൾ ചിത്രങ്ങൾ (ഔട്ട് ലൈൻ ) ഉപയോഗിച്ചും മറ്റും വിശദമാക്കുന്ന ഈ പുസ്തകം ദാമ്പത്യ വിജയത്തിനും ലൈംഗികജീവിതത്തിനും വളരെയേറെ ഉപയോഗമുള്ള ഒരു പുസ്തകം ആണ് . ഇത്തരം പുസ്തകങ്ങൾ വീടുകളിൽ സൂക്ഷിക്കുന്നത് തെറ്റാണ് എന്ന് കരുതുന്നില്ല. കാമസൂത്ര പോലുള്ള പുസ്തകങ്ങളും, ആരോഗ്യ പുസ്തകങ്ങളും പൊതിഞ്ഞ് ആരും കാണാതെ വയ്ക്കുന്ന മലയാളിയുടെ മനസ്സും ചിന്തയും മാറുന്ന കാലം വരേയ്ക്കും കേരളം ലൈംഗിക പരാജയങ്ങളും അക്രമങ്ങളും ദാമ്പത്യ പരാജയങ്ങളും ഒഴിയാത്ത ഒരു ഇടമായിരിക്കും. ആരോഗ്യമുള്ള ഒരു സമൂഹത്തിൽ അവബോധമുള്ള ഒരു ജനതയ്ക്ക് മാത്രമേ പരിഷ്കൃതൻ എന്ന വാക്കും ചേരുകയുള്ളൂ. വായനയ്ക്ക് നിർദ്ദേശിക്കാനും , നവദമ്പതികൾക്ക് സമ്മാനിക്കാനും ഉള്ള ഒരു നല്ല പുസ്തകം ആയി ഇതിനെ നിർദ്ദേശിക്കാൻ ആഗ്രഹിക്കുന്നു .
രതിയും ദാമ്പത്യവും (ലൈംഗികം )
ഡോ. ജെ.കെ.
ഡി സി ബുക്ക്സ് (2016 )
വില : 160 രൂപ
