ഇടറി വീണൊരെന്‍ ദേഹബോധങ്ങളില്‍
ഇനിയുമേതോ കുരിശിന്റെ ബാക്കികൾ..
അടരുവാന്‍ മടിച്ചിപ്പൊഴുമുണ്ടതില്‍
അവരണിയിച്ച മുള്‍മുടിത്തുണ്ടുകള്‍ ….
അകലെയേതോ ഗുഹാന്തര രാവിന്‍റെ
ഇരുളിനപ്പുറം നില്‍ക്കുകയാണ് ഞാന്‍
അനുനിമിഷമെന്നാത്മബോധങ്ങളില്‍
ഒരു പുനര്‍ജ്ജനി തീര്‍ക്കുകയാണ് ഞാന്‍ …..
എവിടെയെന്റെ ജീവന്റെയാഴങ്ങളില്‍
പതിവുജീവിതം മോഹിച്ചൊരാടുകള്‍ ?
എവിടെയെന്റെയീ പഥികപാദങ്ങളില്‍
പതിവു മണ്‍തരി ചേര്‍ത്ത ഗാഗുല്‍ത്തകള്‍ ?
അവിടെയങ്ങതാ കാണുന്നു മേടയില്‍
ബലിമൃഗങ്ങളെ, ലോഹഖഡ്ഗങ്ങളെ
മുടിയിറങ്ങിയ മൃത്യുചിഹ്നങ്ങളെ
മടിയിലേറ്റിയ ശ്വേതരൂപങ്ങളെ …
മറികടക്കുവാനാകുമോ മര്‍ത്ത്യനു
മതമൊരുക്കും മരീചികക്കാഴ്ച്ചയെ ?
മറികടക്കുവാനായാലതുവരെ
കരുതി വെക്കട്ടെ ഞാനെന്നുയിര്‍പ്പുകള്‍ !
