മുന്നിൽക്കാണും വഴികളിലേതാ –
ണെന്നുടെവഴിയെന്നറിവീല
കനലുണ്ടൊന്നിലൊളിഞ്ഞു കിടപ്പൂ
കല്ലും ചളിയും മറ്റൊന്നിൽ
പൂവു പുതച്ചു കിടക്കും വഴിയിൽ –
പ്പോതുകളുണ്ടതിൽ വീണീടും
കാലറിയുന്നീല, കനത്തിൽ
ചളിയാൽ മൂടിയിരിക്കുമ്പോൾ
ആരാരാരുണ്ടിനി നേർവഴികാട്ടാൻ
കൂരിരുളിൽ ദ്യുതിപകരാനായ്
വരവാ,യൊരു തിരി നീട്ടി,യെനിക്കായ്
ക്കരുതിയവെട്ടം തരിവെട്ടം
കാടും നാടും കവിതകൾതേടി –
പ്പാടിനടക്കും കൗതുകമോ?
കണ്ണിലിരുട്ടിന്നഞ്ജനമെഴുതും
കണ്ണീരോ കരിമുകിലോ നീ
വിണ്ണിൻ മാറിലുറങ്ങും ചന്ദ്ര-
ന്നുള്ളിലെ മായാ നീലിമയോ?
നേരിൻ നേരിയ നന്മകൾവീശും
ചാമരമോ പൊൻകതിർമണിയോ?
അത്തിരിവെട്ടച്ചാലിൽ നടന്നേ-
നെട്ടും പൊട്ടും തിരിയാതെ
വഴിയിൽ പൂവിൻ നറുമണമെന്നിൽ
നിറയുമ്പോൾ മനമുണരുന്നൂ
കണ്ടേനപ്പോൾ കനൽവഴിയിൽച്ചെറു
ചെണ്ടായ് നിന്നുടെ സൗഹാർദ്ദം
വേണ്ടാ മറ്റൊരു വഴിയും നിൻ കൈ –
ത്തണ്ടു കരുത്തായ്ച്ചേരുമ്പോൾ
ഹൃത്തിൽക്കവിയും കാവ്യവിപഞ്ചിക –
പുത്തൻ രാഗമുതിർക്കുന്നൂ
കനലും കുളിരും മനമതിലൊന്നായ്
മെനയും കാവ്യകലാഭരണം
