കന്നുക്കുട്ടി പരാധീനം

കറവക്കാരന് മൂന്ന് പൈക്കളുണ്ട് 

മൂന്നിനേം കറവ വറ്റിയ മുറ്റത്ത്

കെട്ടിയിട്ടിരിക്കുകയാണ് 

കുരുക്ക് മുറുകിയ തലകളാൽ.

കുറ്റിയിൽ തളയ്ക്കപ്പെട്ടവർ

ഭൂമി പരന്നതാണെന്ന്

തെളിയിച്ചു കൊണ്ടേയിരിക്കുന്നു.

കാലിത്തീറ്റ നിർത്തി

അരിക്കാടി മറിച്ചിട്ടു

തൊഴുത്ത് പൊളിച്ച് 

പൈക്കൾ വീട്ട് വരാന്തകളിൽ കാവൽ കിടന്നു.

അകത്തളങ്ങളിലെ ഉടമകകൾക്ക്

പുറത്തളങ്ങളിൽ ‘അടിമ’ കിടന്നു.

കണ്ണിലെ ദൈന്യത മാഞ്ഞ്

കുടുക്ക് മുറുകി ശബ്ദമിടറി

കരച്ചിൽ കുരച്ചിലായി.

എച്ചിൽ വാരിത്തിന്ന് വളഞ്ഞുകുത്തി

കുന്തു കാലിൽ 

കുമ്പിട്ടിരിക്കുന്ന പശു

സ്വയംകൃതാർത്ഥം

ഒരു പട്ടിയായി.

പട്ടിത്തോലണിഞ്ഞ

പൈക്കൂട്ടങ്ങൾ

ഓരിയിട്ട് തുടങ്ങി.