“പരസ്പരം
സംഭാഷണം നിലച്ച് പോയ
മനുഷ്യജീവിതമാണ് നമ്മുടേത്. (ഗോവിന്ദനിലെ സിദ്ധാർത്ഥൻ – കെ. അരവിന്ദാക്ഷൻ.)
അന്ധനോ
ബധിരനോ അല്ല !
എന്നിട്ടും,
അയാൾ നിത്യവും അന്വേഷിച്ചു കൊണ്ടിരിക്കുന്നു.
ഒരുവേള അയാളിൽ നിന്നത്
മറ്റൊരുവനിലേക്ക് .
ഏതൊരു അന്വേഷണവും
കനൽവഴികളാണ്.
എളുപ്പത്തിൽ സാധ്യമാകുന്നതല്ല.
“അറിവ് പോലെ,”
പൂർണമാകാത്ത ഒന്ന്.
ഒരിടത്ത് നിന്ന്
മറ്റൊരിടത്തേക്ക് ചഞ്ചലമാകുന്ന
കാഴ്ചയുടെ കണ്ണ്
അതൊരു തീർത്ഥാടനമാണ്
അന്ധനിൽ നിന്ന്
ബധിരനിലേക്ക്,
ലക്ഷ്യത്തിൽ നിന്ന്
മറ്റൊരു ലക്ഷ്യത്തിലേക്ക്,
ജീവനസമരത്തിൻ്റെ വ്യാകുലത –
അവസാനമില്ലാതെ കിടക്കും.
ഒരാൾ അന്വേഷിക്കുന്നതും
കണ്ടെത്തുന്നതും
ജീവിതം തന്നെ.
തീർത്തും പറയാം,
ഒഴിയാബാധയാണത്.
പലർക്കും മുന്നിൽ
വേഷം കെട്ടിയാടുന്ന
ഇജ്ജീവിതം.
